27 November 2010

Unaan a Simba na Adbiento: Pangasinan Reflection

Amin tayo amta tayo so kipapasen na manalagar. Ta inagew-agew, walan lay alagaren tayo. Kabangon tayo, manalagar tayon onublay ed comfort room; manalagar tayon nasumpal so almusal pian maka-onla tayo lad trabaho odino ondago ed eskwelaan; manalagar tayo na luluganen pian maka-onla tayod opisina, odino diad eskwelaan odino diad alog. Inasan manalagar tayo na oras pian sikatayo la so onsempet ed kaabongan tayo. Manalagar kayo ed andokey ya pila, pian labat makateen ed lotto. Insan alagaren so bola pian naamtaan no analo o andi.

Say panag-alagar so kaiba tan kabiangan na bilay tayon amin. Anggaman kabat tayo so liknaan tan experience na manalagar, nanduroma so panag-alagar tayo. Wala ray manalagar ya ag-makalagar. Magan-ganant ira, iratable tan mapaspasnok. Ag iraya makareen ed pila. Ag met ontunda so labir tan tami ra no wala rad pila, odino sikara so naaberya ed dalan.

Wala met so manaalagar ya maanos. Amta ran nasabi-sabi lan lamang so oras ya alagaren da, amta ran onsabi-onsabi so toon alagaren da. Kanian, imbes na walay tami tan pasnok, sikara so manaalagar unong ed say kipapasen na oras tan panaon ya kawalaan da. Walay pasiensia. Walay kabaliksan na oras tan panaon da. Walay panag-paraan ed isabi na alagaren da. Walay liket na panalagar.

Sayan Simba so unaan ya simba na panaon na adbiento. Tan sayan panaon na simbaan et panaon na pana-lagar tayo ed say isabi na Katawan tayon Jesukristo. Say isabi na Katawan ed mamitlo pananao. Unaan, say pakanudnunotan ed say isabi na Katawan nen dwan libon taon lay apalabas. Say Dios inyanak a sakey ya ogaw. Sikatayo ya may panaon na Christmas. Saya et alagaren tayon isilibra. Kumadwa, say panaon ya isabi lamet na Katawan ed sampot na panaon. Agtayo ya amta no kapigan. Balet, onsabin-onsabi so Katawan. Saya et alagaren tayo met. Kumatlo, say isabi na Katawan ed inagew-agew diad unong ed say panangasi to, say bendision to, diad saray sakramento na simbaan: a singa say mapangasin panamerdona na Katawan ed sakramento na kumpisar; say madibinon kiwawala na Katawan ed say sakramento na eukaristia diad say salita na Katawan, tan diad say pangako tayo na Masagradon Laman tan Dala na Katawan.

Panon tayon alagaren so Katawan ed sarayan isabi to? Makabaliksan kasi so pana-alagar tayo? Mas lalo tayo kasin magmlaiw ya maong, maaro tan maanos ya disipulo na Katawan ed sarayan panaon ya panalagar tayo? Odino, agtayo amta so manalagar?

Diad pana-lagar tayod Christmas, singa agtayo amtan alagaren iyan panaon. Ta September labat ni, say kuan tayo la Christmas la. "Ber" la kuantayo. Kanian, Christmas la. Andi ni. Pian, makabaliksan so pan sillibra tayo na Christmas, say inkianak na Katawan, itdan tayo so dili tayon manalagar. Tan diad panalagar tayo, manparaan tayo. Walay anos tayo komon ya iparaan so dili tayo ed say isabi na Katawan. Aliwan ganatan. Aliwan paspasan. Itdan tayoy panaon so puso tayon ekalen so pasnok, tan bosol. Diad panalagar tayo, linisan iray kasalanan tayo pian no silibraan tayo so inkianak na Katawan, twan maliket tayon awaten ed puso tayo. Let us become more generous to others. Let us forgive.

Ontan met so rason no akin et walay nine days ya novena tayo antes na Christmas diad say Misa de Gallo tayo. Aliwan say, pian masa masakbay tayon silibraan so Christmas, no ingen pian diad panalagar tayo, sikatayo so naitday spiritual ya panaon ya makapanparaan.

No natan la et sisilibraan tayo so Christmas ya singa agtayo la makaalagar, panon tayon silibraan iyan makabaliksan no agtayo akaparaan lapud apano tayo ni pasnok, bosol, kolkol, imot tan imon.

Agagik ira ed Kristo. Anggaman labalabay tayon silibraan so Krismas la natan, komon itdan tayoy dili tayon manalagar. Tan diad panalagar tayo makapanparaan tayo. Tan diad pakapanparaan tayo, mas makabaliksan tan makana so silibrasyon tayo na Fiesta na Inkianak na Katawan. Tan twan "Merry Christmas" so walad sikatayo. Ontan pa komon. Amen.

24 November 2010

BECAUSE WE BELIEVE, WE REJECT


Pastoral Statement on Gambling

We believe that God Almighty created man according to His likeness and saved him from eternal damnation by the death and resurrection of Jesus Christ.

We believe that human work has been sanctified by Jesus Christ the worker and that human labor can sanctify humankind.

We believe in the right of all human beings to leisure and recreation within the bounds of Christian justice and charity.

We acknowledge the separation of Church and State and uphold the right and duty of the State to pursue the common good, to promote the welfare of the poor and to provide equal opportunities of advancement for all.

We believe that an honest and just society is possible through the grace of God and the obedience of all peoples to the Ten Commandments.

Because we believe these truths and uphold these principles,

1.       We reject the culture of gambling as a means of livelihood. Gambling is addictive. Gambling corrupts the gambler and the operator. Gambling exploits and diminishes human dignity. Gambling destroys peoples. Gambling kills.
2.       We reject the promotion of the small town lottery as the means to stop illegal gambling. A government that promotes gambling is a morally corrupt government.  Corruption is not just about bribes and graft. Corruption is an attitude that started as an uncorrected bad habit. Gambling started as a small fire. Because we ignored it, this fire has now grown enough to burn our whole nation to ashes. The small town lottery is added fuel to the fire.
3.       We reject the scheme of the small town lottery to give local officials and police officers percentage shares in the revenue of the lottery. This scheme will breed greater moral evils in government service. This scheme is unfair to the poor bettors. This scheme is deceptive.

As we reject the culture of gambling, we also extend our hands of cooperation to our government officials in the pursuit of progress and development.

  1. Instead of allowing sugarcoated jueteng in our province, we invite government to partner with the Church and other NGO’s to promote livelihood programs for the poor and provide family oriented values education especially on the dignity of labor and the primacy of honesty in private and social life. It has been done with success. It is being done. We can do it together.
  2. Instead of allowing the cheap and easy alternative of small town lottery, I invite government to sustain micro financing programs that are already in place in many parts of Pangasinan. This is the long and tedious but sure way to arrest the growth of a gambling culture.
  3. Instead of denying the presence of illegal gambling, let government truthfully accept its presence, humbly accept its failure to stop it and resolve now in cooperation with all peoples of good will, with utmost political will, to restore integrity in public life.

We believe in the beauty and goodness of all. We reject corruption and laziness as against the values we stand for.

We extend our hands for cooperation. If they refuse our offer of help, we will fight without relent.

From the Cathedral of Saint John the Evangelist, Dagupan City, November 13, 2010.



+SOCRATES B. VILLEGAS
   Archbishop of Lingayen Dagupan

20 November 2010

Solemnity of Christ the King: Pangasinan Reflection

Anton klase yan arin bibirbiren tayo? Unong ed ibanghilyo, sikato so inpasak ed krus, niludlurey na totoo nen walad tagey na krus. Tan diad krus, sayan Ari tayo et inatey! Anton klasen Ari ya? Anggapoy pakapanyari to. Talonan.

Apasal tayo ya no nabitla so ari, tampol say walad kanunotan tayo et say pakapanyari to. Tan kaibay pakapanyari say kayamana to. Lapud say pakapanyari tan kayamanan, tatakotay na dakerakal, laut ed saray walad sayakop to. Say ari, odino diad panaon tayo, sakey ya presidente, odino  prime minister, et walay control to ed saray totoo; diad sakey ya salita da, ontowek ira ed sikato; tampol ya onoren day ganggan to. Tan no walay sondalo to, ilaban da anggad sikara so ompatey, nabilay labat so ari da.

Arawdawi ed say inpan-ari na Katawan ya inpaneng-neng tod Ibanghilyo. Si Jesus, ya Kriston Ari, inpasak tan inatey ed krus.

Anggapo lay arum ya pakatalus ed say inpanari na Katawan likud labat ed say abasa tayod ibanghilyo. Anto so kabaliksan na say "Kristo" ya ari tayo? Say Kristo et say kabaliksan to so "Messias", say apili, say "Manangilaban". Tan diad panamegley na krus, si Jesus a Kristo et inlaban to itayo. Inter to so bilay to, nakaukolan ya ompatey pian nailaban to itayo, pian say bilay ya andi-anggaan so nagamuran tayo. Si Kristo, say Manangilaban tayo, say Ari tayo et inter to so bilay to para sikatayo ran totoo to. (Kabaliktaran ed mabetbet ya nagagawa ed mundo: say totoo so mangiter na bilay da para say ari da). Ta lapud say inpan-ari nen Jesus et say inka-aripen to, ay panangaro ya mabolos ton inbagat so bilay para sikatayo!

 Kanian, ontan lay panaglurey na saray opisyales, saray manuoley nen saman, ed si Jesus ya inpasak ed krus. Say kuanda: "Inlaban to ray arum.  Ilaban to met komuy laman ton dili, no tuan sikatoy Cristo a piniliy Dios!" No anto so lurey da, ontan met so kabaliksan na panag-uley da. Para sikara, say panag-uley da et usaren da pian nailaban da so dili da ed antokaman ya makapangiter na kairapan ed sikara. Say panag-uley da et para sikara. Imbes komon ya usaren da so oley da tan say pakapanyari da para say pangkamungan na arum, say manonaan para sikara ed say pangilaban day dili da. Imbes na say bilay so manlingkur para say pankamaungan na karaklan, say karaklan so manlilinkur ed sikara, para say pankamaunga dan bokor.


Aliwan onya so inpan-ari na Katawan. Say inpanari na Katawan et naneng-neng tayo ed say inter tod samay maong ya kriminal ya kaiba nen Jesus ya inpasak ed krus. Sayan too et makasalanan. Maoges. Tan nepeg ya dusaen. Balet, si Jesus, ya Kriston Ari, aliwan dusa so inter tod sayan makasalanan ya kinmerew na panangasi. Say panangasi tan panamerdona so naawat na sayan kriminal a nanlapud si Jesus ya Kriston Ari.


Diad sayan silibrasyon tayo ed say solemnidad na Kriston Ari, komon sikatayo ran totoo na Dios, sikatayo ran mangaako ed say Katawan ya Ari tayo, et manbilay unong ed say inka-ari nen Kristo ya Ari: manibilay a sakey ya managlinkur, manbilay para say panakamaungan na karaklan, manbilay unong ed say panangaro tan panangasi na Katawan tayon Jesus ya Kriston Ari tayo. 


Ontan pa komon. Amen.

For another reflection, click here.

13 November 2010

33rd Sunday in Ordinary Time: Pangasinan Reflection (2)

"Manalwar kayo tan ag kayo palilingo ed siopaman!" Inbaga ya nen Jesus ed saray disipulo pian sikara so manalwar ed dakerakel ya onsabin propitan mantitila ya manamalikdo ra. Agkayo palilingo ed siopaman. No sarag to yan simbawa nen Jesus nen saman, makana met ni ya laut lad sarayan panaon tayo. Ta lapud, mabetbet ya sikatayo so napapalikdo, ya say tila magmamaliw lan katwaan!

"Manalwar tayo tan ag tayo palilingo ed siopaman"  ya mangibabaga ya say bilay tan dignidad na too et walay kantidad. Saya et ibabawag na media, saray angkakabaleg ya corporation ya manlalako na tambal a contraception, say manlalako na paltog tan bala. Say narerengel tan nanaimatonan tayo et onya: duma so dignidad na bilay na toon mairap bilay ed say mayaman. Duma so dignidad na toon mansasakit tan say ogaw ya agni niyanak. Balet tepeten tayo: say too kasi et aliwan nagnap so inkatoo to lapud sikatoy mansasakit, mairap bilay, tan anggapo so pakapanyari to?

"Manalwar tayo tan ag tayo palilingo ed siopaman"  ya mangibabaga ya nasaliw na kuarta ya amin. Nasaliw na kuarta so gayaga na bilay, kareenan tan katunongan o hustisia. Anggaman sayan saliwan et nanaimatonan tayo ed amin bengatla, wala ni so mas makabaliksan nen say kuarta, tan saya et ag nasaliw na anggan anto: say kareenan a manlalapud Dios, say kareenan a bunga na malinis a konsiensa, kareenan a nanlapud twan panangaro ed kapara tan say Dios a Katawan.

"Manalwar tayo tan ag tayo palilingo ed siopaman" ya mangibabaga ya anggapo so permanenten katwaan. Amin et nasalatan, anggan say prinsipio tan moralidad. Kanian, sarag to la so mantakey anggad ag naerel; sarag to la so mantila anggad nagamuran so getma. Sarag to so onyaman ya ag mankimew, unasenso ya mansaol, kanian, anggapo so wala no walay saolen ed politika, tindaan tan diad opisina. Say nalilingwan balet no onya lan onya so gagawaen tayo: say katwaan ag nasakoban tan ag naiyamot ya andi-anggaan. Say moralidad et agnasalatan anggaman saya et susumlangen na dakerakel, say panag-kimey so sankabaliksan ya gawa na too. Ta say nanlapuan na amin et say Dios a Katawan, ya agmansasalat. Tan say ganggan na Dios et ag naoman, anggad iner tan anton panaon. Onoren na amin iya anggan siopa, Presidente man o ordinarion too, mayaman man o makapanyari. Say Dios tan say ganggan to so pundasyon na moralidad tayo, aliwan say labay tan ganggan na too!

"Mananos kayo, pian nagamuran yoy tuan bilay." Diad sampot saya so sipan na Katawan ed sikatayo. Say tumang tayo no tuoren, ilaban tan mansiansia ed katwaan, kamaungan tan kaoksoyan et say tuan bilay a manlalapud say Katawan tayon Jesukristo, a sikato so dalan, katwaan tan bilay tayo. Ontan pa komon. Amen.

33rd Sunday in Ordinary Time: Pangasinan Reflection (1)

"Onsabiy agew a napoolan a singa dayami iray mapaatagey tan maoges a totoo.  Diad satan ya agew napoolan ira tan anggapoy nakeraan ed sikara." Say katononganna Dios so onsabi. Wadia la. Tan para saray arum onsabi ni. Tan para say amin: mantalongaring iyan katonongan diad sampot ya panaon.

No onsabi so katonongan o hustisia na Katawan, manliket itayon amin. Saya so ibabaga na saray babasaen natan a Simba. "Onsabiy agew a napoolan a singa dayami iray mapaatagey tan maoges a totoo.  Diad satan ya agew napoolan ira tan anggapoy nakeraan ed sikara." Tan say kuan tayo: Salamat la Katawan. Saray maoges et natawayan da lan lamang so hustisia na Dios! No nanunutan tayo ra so totoon nanlalames, tan manpapairap ed sikatayo; totoon mamapabaing ed sikatayo la lanang; saray mansasaol ed sikatayo, agay lay inomay tayon manliket ed say isabi na hustisia na Katawan!

Of course, ed sayan panagnunot, tan liknaan, agtayo kaiba ed saray maoges! Agtayo kaiba ed saramay matitila tan manpapairap ed arum; aliwan sikatayo so mamibiktima na panag-sikot, tila o kaugsan ya kagagawa. Saraya et arum a totoo -- aliwan sikatayo.

No matwa tayon birbiren so kipapasen tayo, diad panagbilay  tan saya et birbiren ed arap na Dios -- tepeten ed dili: No onsabi so hustisia na Dios natan, tan okoman itayo na Katawan, maliket tayo kasin awaten iya? Odino walay takot tan pagpaga ed sikatayo lapud, diad katwaan, kaiba tayo ed saray akapangiter na kairapan ed arum; asali tayo met la sikatayo so nantitila tan nasasaol, tan saraya et wala ray totoon apasakitan tayo. No onsabi so hustisia na Katawan, maliket tayo kasin onarap ed say Dios?

Walay liket tayon onarap tan awaten so hustisia o katonongan na Dios na abuloyan tayon pasimbaloen to so bilay tayo. Say apoy na hustisia na Dios so mamasimbalo ed sikatayo! Sayan apoy ya mamool ed saray mauges so sikaton apoy met so mamasimbalo ed sikatayo no lukasan tayo so puso tan bilay tayo ed say panangaro tan panangasi na Katawan. Siopaman so mangawat ed say panangaro, manbilay unong ed panangaro, walay kiwas unong ed panangaro. Say apoy na katonongan na Dios so walad sikato.

Onsabi so katongan na Katawan. Andi saew onsabi iya. No panon tayon akoen iya, dwara labat: walay takot tan pagpapaga odino walay liket tayon onabet ed say Katawan. Diad kaugsan, manari so takot; diad kamaungan, say liket tan ilalo so mantalongaring. Walad sikatayo komon so liket ya onabet ed say isabi na Katawan. Ontan pa komon. Amen.
 

"Lugaw with Father Soc" helps the Binday Housing Project

17 October 2010 - San Fabian, Pangasinan. "It is we who should thank the people of Binday. The people of Binday has given us the opportuniy to love them, and share with them."

Archbishop Socrates B. Villegas, DD gave this statement during the Fund Raising project of the parish to support the "Food for Work" component of the Housing Project in Binday, San Fabian, Pangasinan.

 The beneficiaries of the Holy Family Village with Father Soc during the "Lugaw with Father Soc: Food for Work" fund raising project.


12 November 2010

Position Paper against Provincial Resolution No. 454-2010, "Indorsing the Operation of Small Town Lottery (STL) project in the Province of Pangasinan including its component Cities"


Nen Oktubre 15, 2010, say Sangguniang Panlalawigan na pinabli tayon luyag a Pangasinan so inaprobaan da so sakey a resolution nen Sangguniang Panlalawigan Member Ranjit R. Shahani, a say Provincial Resolution No. 454-2010, “Indorsing the Operation of Small Town Lottery (STL) project in the Province of Pangasinan including its component Cities”.

Ed sayan resolution, inter da so endorsement na operation na Small Town Lottery odino STL ed interon probinsia na Pangasinan, kaiba ra so cities to. Say inter da ya rason no akin wala yan Resolution et sarayan onguendan:

1.       Say Aquino administration so successful ed say declaration da na “all out war” ed say illegal ya sugal diad intiron bansa;
2.      Say Probinsia na Pangasinan so mikakasakey ed national government pian napatunda tan naekal larayan illegal numbers game, laut la ed say jueteng operations;
3.      Say inpakatunda na jueteng operation activities ed Pangasinan so rason ya walay kerew ya altenatibon pakalmoan na panagbilay o livelihood opportunities para saray mandedepende ed say jueteng;
4.      Say Small Town Lottery (STL) so sarag ya alternatibon pakalmoan na panagbilay para saray libo-libon totoo.

Say Mananisia a Laiko na Arkidiosis na Lingayen-Dagupan so mangibabalikas na say opposition ed sayan Provincial Resolution No. 454-2010, lapud sarayan onguendan ya rason:

1.       Saray rason ya inpalapag no akin et walay Resolution No 454-2010 so agto naibabaga so twan kipapasen tan situation na bansa tan say probinsia nipaakar ed say onkakayat tan tuloy-tuloy ya operation na jueteng;
2.      Say rason na Resolution No. 454-2010 et sakey ya sweeping statement/generalization ya inpalapag ya anggpoy agawan public hearing;
3.      Sayan Resolution so mas lalon makaderal na moralidad na totoo’y probinsia, laut lad  say pakaka-aripen na dakerakel ed say mapalikdon sipan na sugal, ya magmamaliw a bogtong ya ilalo ed say kairapan. Say STL so ag sarag ya magmaliw ya alternatibon pakalmoan ya panagbilay para saray kuan ya naekalay pakalmoan lapud say pakaerap na jueteng, lapud say STL, a singa jueteng, et bengatlan manlalames na saray mairap bilay. Say nanaitdan na baleg a benepisio na STL et saray franchise operators.

Unong ed say bangat na Simbaan Katolika ya komon arawian so antokaman ya sugal, ontan lan say pananisia tan conviction ya say STL et mas lalon inganyoen toy kultura na sugal ed say probinsia tayo. Anggaman say STL et legal, ag iya balet niduma ed say makapoy ya epekto na jueteng ya sakey ya sugal tan panlalapoay corruption. Sirin, walaray makapansinagem ya epekto to ed sociedad.

Manpipikasi itayo sirin ya nunuten lamet na saray Miembro na Sangguniang Panlalawigan nipaakar ed say endorsement da ed say Small Town Lottery ed probinsia tayo, tan  mananap iray alternatibon livelihood programs unong ed maong ya panag-kimey, katwaan tan industry.

Tatawagen mi kayo ran pinabli min Pangasinenses, ya manalwar ed say onkokorong ya kultura na sugal ed probinsia tayo. Itanguyor tayo so virtudes na honesty, industry tan hard-work, tan labanan so ngiras tan corruption ed probinsia tayo. Labanan tayo so sugal! Labanan tayo so jueteng! Labanan tayo so STL!

06 November 2010

32nd Sunday - Say Panmutektekan

Siopa ra so Saduceo? Sikara so sakey ed saray pangulon political diad Palestine nen panaon nen Jesus. Aliwa ran singa saray Pariseo ya stricto ed panag-toor day ley nen Moises. Kanian, aliwan singa mabiskeg so pananisia ra no ikumpara ira ed saray Pariseo. Sarayan Saduceo balet et mayayaman ira tan makapanyari ra lapud sikara so mikakasakey ed saray mano-oley ed sikara -- saray Roman authorities. Tan say mabetbet ya pi-oolop da ed saray  paganon Romans et sikatoy rason no akin et apikewet so  kanunutan da nipaakar ed say Dios. Tan saya so rason akin et ag-ira manisia ed say kiolid bilay.

Tan saraya so lingo ra: Unaan, in-aliling day tawen unong ed say panag-talos da ed no anto so mundo. No anto so kipapasen dia ed mundo, para sikara, ontan met ed tawen. Kumadwa, say lingo da initdan day human restrictions so Dios. Say kababatan na Dios para sikara et singa kakabatan na too. Say tawen sirin et singa lanlamang panagbilay diad mundo. Kumatlo, agda aabloyan ya magmaliw a Dios ed bilay da so Dios a Katawan. Ingen, no siopa so Dios, mandepende no anto so labay tan mainomay para sikara.

Balet, say Dios, mas makabat, mas makapanyari, mas matalino nen say sanka-talinoan ed entiron mundo et entiron panaon. Kanian, inpanunot nen Jesus ed sikara so pakalilingoan da.Say Dios, kuan na Katawan et Dios a mabilay. Say Dios et ag balot sarag ya nalimitation na panaon tan pasen.Say Dios et Dios aliwa lapud say labay na too.

No maminsan singa tayo iramay Saduceo. Say mundo tayo natan et aliber-liber na panag-bilay ya aliwan makristiano. Tan saray et values na mundo et manunaan ya nanaalisan so values na pananisia tayo. Kanyan, say bunga ton ya et samay tatawagen tayon "Cafeteria Catholics".

Say "Cafeteria Catholic" et sakey ya katolikon manbibilay na pananisia unong ed singa panag-pili na kanen diad cafeteria. Pilien labat so labay; ipireg so ag labay. Say kabaliksan to ed inkaristiano tayo et onya: say aawaten tayo labat ya bangat na Simbaan tan say Ibanghilyo et saramay labay tayo labat. No saya et mairap tan ag labay, ipireg tan ag la tooren.

Kanian, agaylay panag-awat tayo ed say bangat na simbaan ya panlingkuran tan aruen iray mankakaukolan tan saray mairap bilay. Balet, agay lay irap tayon akoen tan tooren so bangat na simbaan nipaakar ed sexual morality, a singa say panag-usar ed contraception. Odino diad panag-sugal tan panag-teen ed jueteng.

No pipilien tayo so ganggan na Dios tan ipireg iray arum lapud mairap tan ag-mikasakey ed say labay tayon panag-bilay, agtayo aaboloyan so Dios ya mag-maliw a Dios ed bilay tayo! Pagmamaliwen tayo so Dios unong ed say limitation na kanunotan tan labay tayo labat. No onya so gawaen tayo, dakerakel so agtayo nanaawat ya manlalapud say Dios lapu labat ta agtayo la lulukasan so dili tan puso tayo ed say pakapanyari, kakabatan tan say agnatukor ya panangasi na Dios.

Ontan met ed say panagdasal tayo. No tinmunda tayo lan mandasal tan manpikasi lapu labat ya agtayon tampol nanaawat so labay tan pirpirawat tayo, agtayo aabuloyan so Dios ya magmaliw a Dios ed say kakabatan, pakapanyari tan panagasi to. No tinmunda tayo la, ag naiter na Dios ed sikatayo iray grasya tan bendision ton ag natukor na kakabatan tan kanunutan tayo.

Diad ayan misa, ipikasi tayo ya naitdan tayo na grasya na Katawan ya manmatalek ed Sikato. Awaten ya bolbolos so inka-Dios na Katawan ed bilay tayo, tan akoen so mabilay a Dios ed dili tan puso tayo. Ontan pa komon. Amen.