Sayan alimbawa nen Kristo so natalusan tayo no nengneng tan imanoen tayo no siopa ra "bida" tan onta so ginawa ra. Duaran too so linmoob ed timplo ya mandasal: sakey ya Phariseo tan sakey ya pubikano o sumisingil na buis.
Saray Pariseo et disiplinado tan maseet a mananumbok na relihiyon na saray Judio. Seryoso ra nipaakar ed saray ley na relihiyon da. Say kerew na Judaism et maminsan ed sakey taon labat manayuno so sakey ya Judio, balet mamidua ed sakey simba ran manayuno! Mangiiter ira na abuloy ed amin ya nanaalmo da aliwan parte labat na nanaalmo ra. Kanian nen imbaga na samay Pariseo ed samay istorya nen Jesus, “Aliwa ak a singa saray arum a totoon maagum, masaol, tan mikakaloguran! Mamidwa ak a manaayuno tan iiter koy kakplo na amin a nanaalmoan ko”, sikato so ag manlulurey! Siopa ed sikatayo so mangagawa iraya?
Saray sumisingil na buis balet, nen panaon nen Jesus, so bibirbiren iran abeba so moralidad da! Lapud, sikara so manlilingkur ed saray irehes ya Romans, tan mangaawat iray marutak ya kuartan mabetbet ya uusaren na gobiernon agda labay!
Saray sumisingil na buis balet, nen panaon nen Jesus, so bibirbiren iran abeba so moralidad da! Lapud, sikara so manlilingkur ed saray irehes ya Romans, tan mangaawat iray marutak ya kuartan mabetbet ya uusaren na gobiernon agda labay!
Anto so dasal da ya dua? Say dasal na Pariseo et dasal na pisasalamat. Balet nidumaduma yan pisasalamat! Misasalamat ed Dios ya Katawan ta aliwan makasalanan a singa samay sumisingil na buis a kabansag ton linmoob ed timplo.
Samay sakey say dasal to et dasal na panangasi.
Anto so kabaliksan ton yan istorya ed bilay tayo?
Unaan, sikatayo so nilaban nen Kristo. Aliwan lapud dilin pakapanyari tayo et sikatayo so makaonla ed tawen. Say grasya nen Kristo, say tawag tod sikatayo tan say ebat tayo ed sayan grasya so makapangiter na kilalaban tayo. Kanian, say dasal na sakey a makasalanan so dinengel na Dios. Akin? Ta lapud bibirbiren to so panangasi na Dios ed bilay to. Amta na sarayan sumisingil na buis ya say pakanengneng na totoo ed sikara et agto kabaliksan ya pakanengneng met na Dios la. Walay ilalo ran kilalaban, aliwa diad say biskeg na ley na relihiyon, balet onung ed say panangasi tan grasya na Dios.
Samay dasal na Pariseo? Say Dios so misalamat ed sikato ni ingen! Diad arap na Dios, nilastogan toy Dios!
Onya met kasi so panagdasal tayo no maminsan? Aminsan, sinmakit so ngipen ko. Kanian, siak so nadasal. I realize ko ya samay dasal ko balet et dasal na singa sayay Pariseo: say kuanko ed Dios – Akin et onya? Anto so ginawak ya makapoy et sinmakit so ngipen ko? Pari mo ak ni? Ag ak met mantatakew, manaayuno ak met, anggapo met so papateyen ko? Dasal na panangasi manaya so nakaukolan – Katawan, say grasyam so mangiter ed siak na kabiskegen. Kaasian mo ak, a managkasalanan.
Sirin, lapud say panangasi na Dios, say kasalanan tayo so sarag na napirdona na Dios. Saya so kabaliksan na panangasi na Dios. Agto kabaliksan ya lapud sikatayo so nankasalanan et interon bilay tayo la managkasalanan tayo. Agtayo komon lilingwanan ya say katekep na kasalanan et say mapaabebaban panagpataoli. Tan kada kasalanan tayo, walay manaalagar ya panangasi na Dios. The greater the sin, the greater the mercy of God!
Agagik ira, no onloloob tayo ed simbaan ya mandasal anto ra kasi so walad liknaan tan kanunutan tayo?
Diad sampot say panangasi na Dios labat so nakaukolan tayo. Agtayo la nakaukolan ya lastogan so Dios.
Ontan la komon.
Amen.
