ONONAN BABASAEN Kab. nen S. 1:13-15: 2:23-24
Babasaen ya inaon ed libro na Kakabatan nen Solomon
Ag pinalsa na Dios so patey, tan no ompatey iray mabilay a pinalsa, ag to pakaliketan. Pinalsa toy amin a bengatla pian mansiansia ran mambilay, tan maung tan marakep so amin a bengatlan pinalsa to. Anggapod sikara so makapatey a samal. Ag ooleyan na patey iyan mundo, ta ag ompatey so inkatonung na Dios.
Nen pinalsa itayo na Dios, ag to ginetman ompatey itayo; ginawa to itayon singa sikato. Say ibeg na Diablo so angyakar na patey ed mundo, tan saray kayaryan na Diablo so ompatey.
Salita na Katawan.
EBAT A SALMO
E/. Idayew ta ka, Katawan, ta inyagel mo ak.
1. Idadayew ta ka, Katawan, lapud inlaban mo ak tan ag mo inyabuloy ya elek-elekan ak na saray kalaban ko. Ag mo inyabuloy ya onla ak ed lobuk. E.
2. Kantaan yoy panangidayew so Katawan, sikayo ran matoor a totoo to! Nunot yo no anto ray ginagawa na samay Masanto, tan pisalamatan yo! Magangganon onkekepay sanuk to, balet anggad samput na bilay so kaabigan to. Nayarin walay ermen no labi, balet onsoblay so gayaga no kabwasan so onsabi E.
3. Dengel mo ak pa, Katawan, tan kasian mo ak! Tulongan mo ak pa, Katawan! Sinalatan mo na magayagan sayaw so ermen ko; nilakseb mod siak so ermen ko, insan inkawes mod siak so gayaga. Katawan, sikay Dios ko; ando lan andon misalamat ak ed sika. E.
KUMADWAN BABASAEN 2 Cor. 8:7,9, 13-15
Babasaen ya inaon ed kumadwan sulat nen Pablo ed saray taga Corinto
Mayaman kayo ed pananisia, panagsalita, kakabatan, diad seet yon makatulong, tan diad panangaro yod sikami. Kanyan diad sayan panaglingkur lapud aro, mabonluk met komun so panangiter yo.
Ta kabat yoy panangaroy Katawan tin Jesu-Cristo; anggaman a mayaman nagmaliw a mairap-bilay makasengeg ed sikayo, pian onyaman kayo diad panamegley na inkamairap-bilay to.
Ag ko getman palemewen iray arum diad pamabelat kod sikayo; ingen, lapud dakel yo natan, manepeg met ya ontulong kayod saray kaukolan da. Et no mankaukolan ki met tan dakel da, tulongan da kayo met. Diad onya, mampapara kayo. Onung na ibabagay Masanton Sulat,
“Say toon anipoy dakel ag alabas ed kinarakel so kayaryan to, tan say toon anipoy daiset ag alabas ed kinaraiset so kayaryan to.”
Salita na Katawan.
Alleluia
E. Alleluia. Siak so silew na sankamundoan, kuay Katawan; say ontombuk ed siak niwalad sikatoy silew a mangiter na bilay ya andi-anggaan. E. Alleluia.
IBANGHILYO Mar. 5:21-43
Babasaen ya inaon ed masanton ibanghilyo onung ed kinen Marcos
Binmaliw lamet si Jesus ed biek na dayat, tan amayamay iray totoon dinmadagod sikato. Wala met so dinmagon sakey a toon manngaray Jairo, sakey ya opisyal na sinagogad man. Kasabi to, dinmakmomod arap nen Jesus tan akikasi, “Ompapatey so anak kon manmamarikit. Mila ka kari, ta itapew mo labat so limam ed sikato, et onabig tan mambilay!”
Akilan tuay Jesus ed sikato. Dakerakel met iray totoon tinmombuk tan nantotolakan iran onsingger ed kinen Jesus.
Walay sakey a biin labinduay taon lan maniirap lapud alablabas a pandadala to. Amayamay lay nampapatambalan ton doktor tan agastos to lan amin so kuarta to, balet ag onaabig no ag ingen lalon onloloor so sakit to. Nadngelan toy ibabaga ray totoo nipaakar ed kinen Jesus, kanyan akiletletan ya anggad impakaasingger to. Diniwit toy kawes nen Jesus, ta kuantod sikaton dili. “No nadiwit ko labat so kawes nen Jesus, onabig ak la.”
Tinmondan tampol so pandadala to, tan alikas tod laman to ya inmabig la. Diad saman met a bekta, alikna nen Jesus a walay pakayarin pinmaway ed sikato, kanyan inarap to ray walad nibeneg to tan inkuanto, “Siopay aniwit ed siak?”
Inmebat iray disipulo to, “Anta sankanengneng mon deresdesen kay dakerakel a totoo, tepeten mo no siopay aniwit ed sika?”
Intuloy nen Jesus so pannenengneng tod kaliber-liber to, diad panaanap to no siopay nanggawa. Samay bii amta toy agawa, kanyan manggiwgiw ed takot to. Dinmagon nantalimukor ed arap nen Jesus, tan impatwa ton amin so agawa ed sikato. Inkuanen Jesus, “Anak ko, say pananisiam so amaabig ed sika. Onla kan mareen lay kalakal mo, tan ag la ompawil so sakit mo.”
Mansasalita niy Jesus nen pigaran totooy sinmabi a nanlapud abung nen Jairo, “Inatey lay anak mo?” kuanda, “akin et aabalaen mo niy Maistro?”
Balet ag inimano nen Jesus so imbaga ra. Inkuanto ingen ed kinen Jairo, “Ag ka natatakot; pabiskeg moy linawam.” Anggapoy inabuloyan nen Jesus a milad sikato no ag si Pedro tan saray sanagin Santiago tan Juan labat. Nen sinmabi rad abung nen Jairo, anengneng nen Jesua a magolo-golo ray totoo. Wala ray mannangnangis tan manogogaog. Linmoob ed abung tan inkuantod saray totoo, “Akin et magologolo kayo? Akin et mannangnangis kayo? Ag inatey so ogaw; nanaogip labat!”
Inelek-elekan da labat si Jesus. Pinapaway to ran amin, likud ed saray ateng na ogaw tan saramay taloran disipulo, insan linma rad kuarton kawalaay ogaw. Binembenan tod lima tan inkuanto, “Talitha koum,” a say labay ton ibaga, “Ining, ibabagak ed sika, bangon ka!”
Binmangon a tampol imay ogaw, a mantaoy labindua, tan nanakar. Ontan lay pankelaw dan amin. Impupurek nen Jesus ya anggapoy pangibagaan dan balut na sayan agawa. Insan kuanto, “Itdan yoy kanen to.”
Ibanghilyo na Katawan.
