Walay dwaran pasen ya abitla ed saray babasaen tayo natan. Unaan, diad Tanamanan na Eden o Garden of Eden. Diman wadman ya amin so dakerakel ya kiew tan tanaman, ayep tan saray manok. Diman, wadman ya amin so nakaukolan na too ya inter na Dios ed si Adan tan si Eba ya usaren, asikasoen, pabolaslasen. Malinlinew balet ya anggaman inter na Dios ed sikara, say Dios ni so akan-kayaryan na amin ta lapud nanlapu ed say Dios ya amin. Inpabayes, tan ipapaasikaso na Dios labat ed sikara di Adan. Kanian, pian agnalingwanan nen Adan tan Eba iya, say Dios inter tod sikara so ganggan – sakey ya ley ya tooren da: ag nayarin kanen so bunga na kiew a mangiiter na pakaamta ed maung tan maoges. Diad Garden na Eden, alingwanan di Adan tan si Eba ya sikara so manag-asikaso labat na Dios; inpabayes labat na Dios ed sikara so amin; aliwan sikara so akankayaryan na Garden of Eden. Lapud sayan inpakalingwan da, sikara so nankasalanan.
Say kumadwan pasen ya abitla: say kalawakan; say disierto ya nakar na Katawan ya nandasalan tan nan-ayunoan. Say kalawakan so kabaliktaran na Garden of Eden: anggapo so tanaman; anggapo so bunga-bunga, anggapo so masasamit ya kakanen. Diad disierto na Katawan balet, diman atalo so tukso. Diad disierto, anggaman naalmo so kairapan, wadman so pakapanyari na Dios.
Diad sayan kuaresma, sarag tayo met so onlad disierto na bilay tayo: say pamirbir ya sikatayo labat et tinawag na Dios ya manag-asikaso na say mundo. Birbiren tayo ya diad gapoy-gapo, anggapo so kayaryan tayo. Nanlapu ya amin ed say Dios; say Dios ya aliwan masiblet. Say Dios inpalima ton amin labat ed sikatayo so mundo, pati say bilay ya bebenbenan tayo.
Diad sayan disierto, anggapoy arum no say Dios. Say Dios so amin. Tan lapud sikatayo labat so akingipalimaan na Dios so amin ya pinalsa to, agtayo komon lilingwanan ed sarayan panaon na kuaresma ya manbilay unong ed say Generosity na Dios ed sikatayo, manbilay unong ed say Panangasi na Dios tan manbilay unong ed say Pakapanyari na Dios.
Lapud say Dios et alab-labas so Generosity to, lapud say Dios et aliwan masiblet, komon sipaparaan tayon manbilay ed PISASALAMAT ed say Katawan. Lapud iiter na Dios ya amin ed sikatayo so nakaukolan tayo, tan inter na amin ya usaren tayo so pinalsa to, asikasoen irayan amin. Agtayo deralen so bilay tayo, agtayo daraken so mundo tayo, agtayo dutaken so kaliber-liber tayo. Agatayo sarag ya gawaen ya anggan anto nipaakar ed sarayan inpaasikason tan inpabayes na Dios ed sikatayo: RESPONSIBILIDAD itayo irayan amin. Natan tan diad arapen iran panaon.
Lapud say Dios et aliwan masiblet ed sikatayo, komon amta tayon manbilay ya kontento ed saray walad sikatayo. No agtayo nakontento, say labay ton ibaga, kulang iray walad sikatayo. Tan no aakoen tayon kulang iraya, panon tayon misalamat ed say Dios? Komon simpli iray labay tayo, tan daiset iray nakaukolan tayo. Ta no kontento tayo ed say daiset ya walad sikatayo, say tatawagen ya duga et baleg lan fiesta! “If I am content with little, enough is as good as a feast”.
Manbilay tayo met sirin unong ed sayan generosity na Dios. Manbilay tayon aliwan masiblet. Akin et agaylay irap tayon mangiter? Ta lapud natatakot tayo ya naupotan itayo. Lapud natatakot tayon sikatayo so naandian no mangiter tayo ed arum. Say labay to yan ibaga: agtayo manisia ya say Dios yet aliwan masiblet. Agtayo manmamatalek ed say Panangasi na Katawan ed sikatayo. Say Dios Mapangasi. Sayan panangasi na Dios et agnsabsabaan.
Panon tayon nasukat no sikatayo so generous? Aliwan diad kabaleg na iiter tayo. Say toon generous et aliwan samay angiter na sankabalegan, no ingen et samay angitilak na daiset para sikato. Ta lapud manisia ya say Dios et aliwan masiblet, tan agpatayo so Dios nipaakar ed say pangiter na nakaukolan tayo.
Diad Paraiso na Eden, abalang na too so grasyan bilay ya andi-anggaan; diad disierto na Katawan, inpawil tod sikatayo so bilay ya walad sayakop na panangaro tan panangasi na Dios, ya ag nasabsabaan so iiter ton bendisyon ed sikatayo ran toon angipalimaan to labat so amin a pinalsa to. Ontan pa komon. Amen.
