Ononan Babasaen Isa. 50:4-7
Babasaen ya inaon ed libro na propita Isaias
Imbangat na Katawan a Dios ed siak so salitaen ko, pian napabiskeg ko so linawa na toon mapaga. Kapag kabwasan iitdan to ak na pilalek ya ondengel ed ibangat to. Say Katawan initdan to ak na pakatalus, et ag ak linmaban ed sikato odino inarawian ko.
Intaryak so beneg ko ed saray nansiplat ed siak. Ag ko ra binaat nen pinabaingan da ak, nen binagut da ray balbas ko tan nilulukdaan day lupak.
Balet ag ak nasakitan na saray panamabaing da lapud tutulongan ak na Katawan a Dios. Pinakapal koy lupak pian nitepel ko ra. Amtak ya ag ak napelag ed kababaingan.
Salita na Katawan.
Ebat a Salmo
E. Dios ko, Dios ko, Akin et inkaindan mo ak?
Kumadwan Babasaen Fil. 2:5-11
Babasaen ya inaon ed sulat nen Pablo ed saray taga Filipos
Nepeg yon aligey ogali nen Cristo Jesus: Anggaman a walad sikatoy inka-Dios, ag to impasoot a mansiansian kaparay Dios. Nilakseb to ingen so inka-Dios to, tan inala toy kipapasen na aripen nen nagmaliw a too. Nampaabeba tan maonur ya anggad patey – on, anggad ipapatey ed krus. Kanyan say Dios intanduro to ed sankatageyan, tan initdan toy ngaran a matalonggaring nen say dinan man a ngaran. Diad ontan, amin da ray apalsan walad tawen, diad mundo tan dalem na dalin ontalimukor iran mangigalang ed ngaran nen Jesus. Ibawag met ed satan na amin a katoowan a si Jesu-Cristo so Katawan. Lapud saya, say Dios Ama so nagalang.
Salita na Katawan.
Birsikulo Kasakbayay Ibanghilyo
Si Cristo nagmaliw a maonur para sikatayo ya anggad patey ed krus. Kanyan say Dios intanduro to ed sankatageyan, tan initdan toy ngaran a matalonggaring nen say dinanman a ngaran.
Ibanghilyo Luc. 23:1-49
Babasaen ya inaon ed masanton ibanghilyo onung ed kinen Lucas
Inmalagey iray mamatakken na baley, saray manonan papari, tan saray iskriba, insan da inyakar si Jesus ed kinen Pilato.
Ginapoan dan inakusa, “Narel mi yan too,” inkuanda, “a sosogsogan to ray totoo mi a manggaway aliwa. Isesebel to met so pambayar na buis ed Impirador. Ibabaga to nid saray totoo a sikatoy Cristo, say sakey ya ari.
Tinepet nen Pilato, “Sikay ari da ray Judio?”
“Sika lan dili so mangibabaga,” ebat nen Jesus.
Inkuanen Pilatod satan ed saray manonan papari tan saray totoo, “Anggapoy naalmok a kasalanan to yan too.”
Balet lalon kuandan impasoot, “Diad panamegley na pambabangat to, nasosogsogan iray totoo. Inggapo tod Galilea, insan diad intiron Judea, tan wadya la natan.”
Nen nadngel ya nen Pilato, tinepet to, “Akin, taga Galilea yan too?” Nen akabatan ton si Jesus et nanlapud pasen a nasasakopan nen Herodes, imbaki toy Jesus ed sikato ta wadman ed Jerusalem ed saraman ya agew. Makaliliket si Herodes nen anengneng toy Jesus, ta abayag lan mampipirawat a napilupaan to yan too, lapud amayamay lay abalitaan ton nipaakar ed sikato. Maniilalon nanengneng ton manggaway milagro si Jesus. Kanyan abayag a tinepetan to, balet ag balut inmebat si Jesus. Inmasingger iray manonan papari tan saray iskriba tan ontan lay impangakusa rad kinen Jesus. Si Herodes tan saray sondalo to niludlurey tan pinapabaingan day Jesus. Sinolungan day marakep a kawes, insan da impawil ed kinen Pilato. Diad saman ya agew, akapankaaroy Herodes tan si Pilato, saray gendat a mambobosulan.
Impatawag nen Pilato ray manonan papari, saray opisyal na baley, tan saray totoo, tan inkuantod sikara, “Inyakar yo yan tood siak, ta kuanyon sosogsogan to ray totoo a manggaway aliwa. Natan, inosisak la tan naimatunan yo met, balet nalmoan ko ya anggapoy kasalanan to ed saray ipapakasalanan yod sikato. Anggapo met so nalmoan nen Herodes a kasalanan to, kanyan pinapawil to diad sikatayo. Anggapoy ginawa to yan too a makasengeg na pamateyan ed sikato. Kanyan pasipsiplatan ko, insan ko la ibolus.”
Balet nankakasakey ya inmeyag iran amiy totoo, “Pateyen itan a too! Si Barabbas so labay min ibolus mo!” (Aprisoy Barabbas lapud golon agawad siudad, tan lapud impamatey to.)
Si Jesus balet so labay nen Pilato ya ibolus, kanyan nansalita lamet ed saray totoo. Balet lalon inmeyag ira, “Ipasak mod krus!” Ipasak mod krus!”
Pinitlo nen Pilato ya inkuan ed sikara, “Akin, antoy ginawa ton kasalanan? Anggapoy naalmoan kon ginawa ton makasengeg na pamatey ed sikato! Kanyan pasipsiplatan ko, insan ko la ibolus.”
Balet lalon inkasikasil dan ineyag a nepeg ya ipasak ed krus si Jesus. Diad kaonuran, analoy impaneeyag da. Kanyan insintinsia nen Pilato ed kinen Jesus imay kekerewen da. Imbolus to may toon papaibolus da, samay apriso lapud impanggolo tan impamatey to. Insan impalima toy Jesus ed sikara, pian nagawaan dad sikato so labay da.
Nen iyaakar dan ipasak ed krus si Jesus, nabet day sakey a lakin nanlapud barrio. Taga Cirene yan too, tan manngaray Simon. Sinabat da, tan impasakbat day krus ed sikato, insan da pinatombuk ed kinen Jesus.
Amayamay iray totoon tinmotombuk ed kinen Jesus, pati saray bibiin mannangnangis tan maneermen lapud sikato. Nilingaw nen Jesus ira tan inkuanto, “Bibiin taga Jerusalem! Ag yo ak nanangisan. Nangisan yo ingey sikayon dili tan saray anak yo. Ta onsabi la ray agew ya ikuanda ray totoo, “Mapalar iray bibiin lepes, saray ag mananak, tan saray ag nampasuso!’ Diad sarayan agew, saray totoo ikuandad saray palandey, ‘Tumbaan yo kami!’ tan diad saray pokdul. ‘Tabunan yo kami!’ No gawaen da yad siak a kaparay mabilay a kiew, anto la kasiy gawaen dad sikayo a kaparay amagaan a kiew?”
Wala met iray duaran kriminal ya inyakar dan pateyen a kabansag nen Jesus. Nen sinmabi rad pasen a tatawagey “Lapis-lapis na Olo,” diman da impasak ed krus si Jesus. Impasak da met ed sansakey a krus ira may duaran kriminal, say sakey diad nikawanan tan say sakey diad nikawigi nen Jesus.
Inkuanen Jesus, “Ama, pirdonam ira, ta ag da amtay gagawaen da!”
Kayari tan nampapalaranan iray kawes to, inapag da. Manalalagey iray totood man tan bambantayan day Jesus; balet saramay opisyal na baley niludlurey da. Inkuanda, “Inlaban to ray arum. Ilaban to met komuy laman ton dili, no tuan sikatoy Cristo a piniliy Dios!”
Niludlurey met na saray sondalo; inasinggeran da, initdan day alak tan inkuanda, “Ilaban moy sikan dili, no tuan sikay ari da ray Judio!”
Onyay akasulat ed olowan to: “Sikato yay Ari da ray Judio.”
Pinapabaingan na sakey ed saramay mambitbitin a kriminal. Inkuanto, “Aliwa tan sikay Cristo? Ilaban moy sikan dili tan pati sikami met!”
Balet nampasnukan na samay kaiba to ya inkuanto, “Ag mo tatakotay Dios, anta namparay dusam ed sikato? Nepeg tan dua so nadusay onya lapud ginawa ta, balet sikato anggapoy kasalanan a ginawa to.” Insan inkuantod kinen Jesus, “Nunot mo ak, Jesus, no kasabim ed Panarian mo!”
Inkuanen Jesus ed sikato, “Kuankod sika: diad sayan agew, kaiba mo ak ed Paraiso.”
Sakey ya alas dosid kaagewan ya anggad alas tris ed ngarem nen binmilonget so intiron dalin, naandiay liwawa so agew, tan apaldua so kurtina na Timplo. Inmeyag na maksil si Jesus tan inkuanto, ‘Ama, iyawat kod saray limam so ispirituk!” Kapangibaga to ya, inatey.
Nen naimatunan yan agawa na kapitan da ray sondalo, indayew toy Dios. Inkuanto, “Tua a matonung yan too!”
Sayan agawa naimatunan na amin da ra may dinmagop a nambantay, tan sinmempet iran tapuk-tapuken day kapagewan da. Manalalagey ed bandad arawi ray amin a kakaaro nen Jesus, pati saramay bibiin tinmombuk ed sikaton nanlapu lad Galilea, tan naimatunan da ra yan agawa.
Ibanghilyo na Katawan.
