4th Sunday of Advent: Pangasinan Reflection (A)

 

Dakerakel so plano tayo. Amin tayo so walaray pirpirawat tayon nagamuran ed bilay tayo. Ontan la sirin so planon gaween tayo pian nagamuran irayan amin.

Singa bilbilang, wala may sakey ya akatongtong kon sipaparaan lan onlad abroad ya mantrabaho. Akaparaan lan amin. Balet, antes ya makaalis, sikato so nansakit. Ag atuloy so plano ton manabroad. Ontan met ed samay sakey ya linmad siak ya agaylay panlabay ton makalay bakasyon to ed sayan arapen ya Pasko ya anggad Balon taon.Wala met laray plano to no panon ton usaren so panaon ya panbakasyon to. Balet, ag natuloy iyan bakasyon ta samay boss to ed sikato so manbakasyon tan sikato so natilak ya manasikaso na negosyo.

Dakerakel so plano tayo ya tua. Balet aliwan amin irayan plano et natultuloy.

Ontan met ed say bilay nen Jose ya asawa nen Maria, ina na Katawan tayon Jesukristo. Wala met la so plano to nipaakar ed say pangisian to ed si Maria. Balet sayan plano et ag atuloy. Ta lapud sakey a kogip ya akaawatan toy mensahe na Dios. Siopan plano so atumbok? Aliwan samay plano nen Jose, no ag ingen et plano na Dios.

Dakerakel so plano na too. Ontan met so karakel na plano na Dios et sikatayo. Siopan plano so natumbok sirin?

Nen pinalsa na Dios so too, walad plano na Dios ya say too et sililiket ya manayam ed paraiso. Manbilay ed katunongan tan kamaungan a mikasakey ed say Dios. Balet,  say too so nankasalanan. Tan sikato so apaekal ed paraiso. Anggaman ontan, say plano na Dios so wadman ni: say too ya pinalsa to so maandon mikasakey ed Sikato. Kanian, pian matua so Dios ed sayan plano to, imbaki to so Anak to pian dondonen to itayo ed kasalanan tan naunor so linawa na Dios ya sikatayo so ompawil ed sikato ed katunongan. Anggaman wala ray sumlang ed sayan plano na Dios, sikato ya so atumbok lan lamang.

Ontan la sirin, ya saksakey so walad plano na Dios: say kilalaban tan say pikasakey tayo ed Sikato ed tawen ya kawalaan To. Tan amin iran arum a plano nepeg ya mikasakey ed sayan plano odino linwa na Dios.

Ontan la so inpaunor nen Jose ed plano na Dios anggaman aliwan saman so unaan ya plano to. Balet nen tinombok to so plano na Dios, amin la ya pirpirawat to et agamuran to lan lamang.

Agyalay irap ya itbanan so plano tayo. Agaylay irap na salatan tayo so plano tayo. Tan mas lalon agaylay irap ya talosan so plano na Dios parad sikatayo. Balet singa si Jose, anggaman agto atalusan ya amin so plano na Dios ontan lan inonor to. Ta lapud inter to so sankabalgan ya TALEK to ed say Dios a Katawan.

No wala ra so plano tayon aderal. No wala ra so plano tayon agtayo asumpal. Agkayo mapaga. Agkayo natatakot. No tuan iter tayo so TALEK tayo ed say Dios a Katawan lapud sarayan aderal tan ag-atumbok a plano tayo, agtayo komon lingwanan ya no say onsublay lan kekerewen na Dios et awaten tayo ed bilay tayo so plano to met. No ag atuloy so plano tayo, sipaparaan tayon awaten ya manmatalek so plano na Dios. Tan amin iray labay tayon getmaen, nagamuran tayo lan lamang.

Say dasal tayo labat sirin: O Dios ko, manmatalek ak ed sika. Say linawam so nagawad siak.

Ontan la komon.

3rd Sunday of Advent: Pangasinan Reflection

"Ibagam pad sikami: sika may aalagden min onsabi o manalagar kami niy sananey?" Saya so patetepet nen Juan Bautista ed si Jesus . Dakerakel la so narerengel to nipaakar ed si Jesus.  Si Juan ni balet so manderewa-rwa. Siopa yan si Jesus? Sikato la ya kasi so Manangilaban ya aalagden la? Anto so kabaliksan na sarayan balita nipaakar ed sikato? Labay nen Juan ya siguradoen no si Jesus so twan Messias ya aalagden lan abayag.

Say ebat nen Jesus, aliwan peteg ya pangako ya sikato so Messias. "Pawil kayod kinen Juan tan ibaga yoy narerengel tan nanenengneng yo: saray bulag makakanengneng ira, saray lopuy makakaakar ira, saray akating onaabig ira, saray telek makakadngel ira, saray inaatey nabibilay ira, tan saray mairapbilay nipupulong ed sikara so Maung a Balita. Maliket so toon ag naekalay pananisia ed siak!" Sarayan amin ya imbaga nen Jesus et onong ed si propita Isaias. Unong ed si Propita Isaias, no onsabi so manangiyagel a Dios, " makanengneng iray bulag, tan makadngel iray telek. Manlukson singa ulsa iray piley, tan mankantad liket iray emel. Magayaga ran makasabid Jerusalem, mangankanta tan maneyag-eyag irad liket da. Manliket iran ando lan ando, naandi lan anggad angga so ermen tan dageyem."

Siguro nen nangel nen Juan so ebat nen Jesus sikato so manlukso ed dalem na prisoan! Manlukso ed liket to! A singa samay unaan dan inpan-abetan nen Jesus. Nen binmisita si Marian maluken ed si kapinsan ton Isabel ya manluken met ed kinen Juan, si Juan so linmukso ed liket!

Sayan Simba so tatawagen na Simba a Gaudete Sunday odion Simba na Gayaga! Ta lapud asinnger lay isabi na say Manangilaban tayo! Anggaman agtayo manlukso ed liket a singa si Juan, walay gayaga tan liket ed kapusoan tayo lapud say panangaro tan panangasi, say generosity tan say kiwawala na say Dios tayo ed kapegleyan tayo.

Maliket itayo lapud say ilalo ya iiter na say Masanton Ibanghilyo ed sikatayon amin. Sikatayo ra ya walad kabilongetan na kasalanan, ta naitday tayo na mapangasin panamerdonan na Dios; sikatayo ran walad inkalopoy lapud say takot tan dakerakel ya pagpaga tayo, manliket tan mangayaga tayo! Walay Dios ya maabagey, ilaban to itayod sarayan pagpagaga tayo. Manmatalek tayo ed sikato. Sikatayo ran walay liliknaen, saray natetelek ed karekel na problema, mangagayaga tayo! Say Dios ya Manangilaban tayo et agto itayo paulyan. Gali dia sikayo ran mansasakbat na krus yo, ta panpainawaen ta kayo! Kuay, Katawan. Maliket so too ag naekalay pananisia ed say Dios a Katawan!

Diad kairapan tan kabilongatan na prisoan nen Juan Bautista, naawat to so Maong a Balita: say Dios so wadia lad kapegleyan tayo! saray bulag makakanengneng ira, saray lopuy makakaakar ira, saray akating onaabig ira, saray telek makakadngel ira, saray inaatey nabibilay ira, tan saray mairapbilay nipupulong ed sikara so Maung a Balita.

Salamat ed say Dios ya ag nasabsabaan so panangaro to, say bendision to, say grasya tod para sikatayon amin! Awaten tayon sililiket irayan amin. Sikato  so mangiwawanwan ed sikatayo ed kaabigan. Sikato so silew pian nanengneng tayo so dalan na kaptekan tan kamaungan. Sikato so biskeg tayo pian nailaban tayo so katunongan. Say salita na katwaan. Say bilay na kareenan tan pankakasakey. Panangaro tan panangasi.

Maliket so toon ag naekalay pananisia ed siak!"

Ontan pa komon. Amen.

2nd Sunday of Advent (A): Pangasinan Reflection

"Impapatwa ray kasalanan da, tan binibinyagan to rad Ilog na Jordan." Si Juan a Managbinyag so dadagoen na totoo ya manpabinyag. Sakbay iran binyagan nen Juan, sikara so napapatwa na kasalanan da. Saya so nakaukolan ya gawaen da pian naawat da so binyag nen Juan. Sayan panagpatwa na kasalanan et katekep toy panagbabawi ed saray kasalanan. Sirin say binyag ya iiter nen Juan et binyag na panagbabawi: say panagpatwa na kasalanan tan say panagbabawi ed sarayan kasalanan.

Sinminger ira met so grupo na saray Pariseo tan saray Saduceo. Labay da met so manpabinyag. Balet, inarap ira nen Juan. Kuantod sikara: "Sikayon apoliyay oleg! Siopay angibagad sikayon naliktaran yoy pasnuk na Dios ya asingsingger lan onsabi? Ipanengneng yod panagbilay yo a binenegan yo la ray kasalanan yo." Ibabaga nen Juan ed sikara: Pian naawat yoy binyag ya iiter ko, nepeg ya akoen yoy katwaan na saray kasalanan yo, manbabawi kayo tan benegen yo ray kasalanan yo. Anggaman labay day manpabinyag, sarayan Pariseo et agmet ira akaparaan ya patwaan so kasalanan da, tan manbabawi ra. Para si Juan, anggapoy kakanaan na inyakar dad sikato ta anggapod sikara so tuan panagbabawi; say peteg ya pamasimbalo na bilay da, tan say grupo ra.

"Impapatwa ray kasalanan da, tan binibinyagan to rad Ilog na Jordan." Anggad anggapo so manpatwa ed saray kasalanan ya nanaimatonan tayo, anggapod sikatayo so pasimbalo na bilay tayo. Labay tayo ya say bansa, say baley, say pamilya, say dilin bilay tayo et walay kareenan tan pankakasakey pian nagamuran tayo so oksoy ya makapangiter na aliguas na bilay tayo. Balet ag nagamuran iraya anggad akoen tan ipatwa iray kakulangan tan kasalanan tayo.

Say Dios kabat to amin; say Dios a mapangasi so sobol na amin ya grasay. Diad arap na Dios itayo manpatwa so kipapasen na dili tayo pian napasimbalo tayo so bilay tayo: Anggad agtayo akoen ya walay liliknaen tayo ed arap na doktor, agtayo onabig tan naitday biskeg na laman:

Anggad anggapoy mangako ya walay corruption ya nagagawa ed gobierno, ag ontunda so takewan na public funds. Anggad ag ipatwa ya walay mangilalako na droga tan wala ray mansasaliw tan manu-usar, ag nabalang so drug addiction tan saray kaugsan ya katekep to yan bisio. Anggad ag ipatwa ya walay saliwan tan lakoan na boto no eleksyon, mansiansia ya marutak, aliwan peteg so panamili tayo na saray opisyales tayo. Anggad ag ipatwa ya walay manpapakorang na jueteng, tan walaray manproportekta ed saya, ag ontunda so sayan illegal tan immoral ya gawa. Anggad ag ipatwa ya sikatayo so nantila, nantakew, nan-labir ed arum, nan-sikot, ag tayo nagamuran so kaoksoyan na bilay tayo, tan bilay na pamilya tayo. Anggad sikatayo so mabulag-bulagan, mantelek-telekan, tan manemel-emelan ed saray kaugsan ya nanaimatonan tayo, panon tayon onaliguas? Panon ya nagamuran so kareenan? Panon tayon napasimbalo so bilay tayo? Panon ya abeten so Katawan ed say isabi na Inkianak to?

Sayan panaon na Adbiento et panaon na panparaan na dili tan say pamilya, baley tan bansa tayo ed say isabi na Katawan ed say Fiesta na Inkianak to. Manunaan ed sayan panparaan tayo et say panpasimbalo tayo unong ed say panbabawi na kasalanan tayo. Nepeg sirin ya ipatwa ya sikatayoy nankasalanan, pian peteg tan makabaliksan so panagbabawi tayo. Ontan pa komon. Amen.

Unaan a Simba na Adbiento: Pangasinan Reflection

Amin tayo amta tayo so kipapasen na manalagar. Ta inagew-agew, walan lay alagaren tayo. Kabangon tayo, manalagar tayon onublay ed comfort room; manalagar tayon nasumpal so almusal pian maka-onla tayo lad trabaho odino ondago ed eskwelaan; manalagar tayo na luluganen pian maka-onla tayod opisina, odino diad eskwelaan odino diad alog. Inasan manalagar tayo na oras pian sikatayo la so onsempet ed kaabongan tayo. Manalagar kayo ed andokey ya pila, pian labat makateen ed lotto. Insan alagaren so bola pian naamtaan no analo o andi.

Say panag-alagar so kaiba tan kabiangan na bilay tayon amin. Anggaman kabat tayo so liknaan tan experience na manalagar, nanduroma so panag-alagar tayo. Wala ray manalagar ya ag-makalagar. Magan-ganant ira, iratable tan mapaspasnok. Ag iraya makareen ed pila. Ag met ontunda so labir tan tami ra no wala rad pila, odino sikara so naaberya ed dalan.

Wala met so manaalagar ya maanos. Amta ran nasabi-sabi lan lamang so oras ya alagaren da, amta ran onsabi-onsabi so toon alagaren da. Kanian, imbes na walay tami tan pasnok, sikara so manaalagar unong ed say kipapasen na oras tan panaon ya kawalaan da. Walay pasiensia. Walay kabaliksan na oras tan panaon da. Walay panag-paraan ed isabi na alagaren da. Walay liket na panalagar.

Sayan Simba so unaan ya simba na panaon na adbiento. Tan sayan panaon na simbaan et panaon na pana-lagar tayo ed say isabi na Katawan tayon Jesukristo. Say isabi na Katawan ed mamitlo pananao. Unaan, say pakanudnunotan ed say isabi na Katawan nen dwan libon taon lay apalabas. Say Dios inyanak a sakey ya ogaw. Sikatayo ya may panaon na Christmas. Saya et alagaren tayon isilibra. Kumadwa, say panaon ya isabi lamet na Katawan ed sampot na panaon. Agtayo ya amta no kapigan. Balet, onsabin-onsabi so Katawan. Saya et alagaren tayo met. Kumatlo, say isabi na Katawan ed inagew-agew diad unong ed say panangasi to, say bendision to, diad saray sakramento na simbaan: a singa say mapangasin panamerdona na Katawan ed sakramento na kumpisar; say madibinon kiwawala na Katawan ed say sakramento na eukaristia diad say salita na Katawan, tan diad say pangako tayo na Masagradon Laman tan Dala na Katawan.

Panon tayon alagaren so Katawan ed sarayan isabi to? Makabaliksan kasi so pana-alagar tayo? Mas lalo tayo kasin magmlaiw ya maong, maaro tan maanos ya disipulo na Katawan ed sarayan panaon ya panalagar tayo? Odino, agtayo amta so manalagar?

Diad pana-lagar tayod Christmas, singa agtayo amtan alagaren iyan panaon. Ta September labat ni, say kuan tayo la Christmas la. "Ber" la kuantayo. Kanian, Christmas la. Andi ni. Pian, makabaliksan so pan sillibra tayo na Christmas, say inkianak na Katawan, itdan tayo so dili tayon manalagar. Tan diad panalagar tayo, manparaan tayo. Walay anos tayo komon ya iparaan so dili tayo ed say isabi na Katawan. Aliwan ganatan. Aliwan paspasan. Itdan tayoy panaon so puso tayon ekalen so pasnok, tan bosol. Diad panalagar tayo, linisan iray kasalanan tayo pian no silibraan tayo so inkianak na Katawan, twan maliket tayon awaten ed puso tayo. Let us become more generous to others. Let us forgive.

Ontan met so rason no akin et walay nine days ya novena tayo antes na Christmas diad say Misa de Gallo tayo. Aliwan say, pian masa masakbay tayon silibraan so Christmas, no ingen pian diad panalagar tayo, sikatayo so naitday spiritual ya panaon ya makapanparaan.

No natan la et sisilibraan tayo so Christmas ya singa agtayo la makaalagar, panon tayon silibraan iyan makabaliksan no agtayo akaparaan lapud apano tayo ni pasnok, bosol, kolkol, imot tan imon.

Agagik ira ed Kristo. Anggaman labalabay tayon silibraan so Krismas la natan, komon itdan tayoy dili tayon manalagar. Tan diad panalagar tayo makapanparaan tayo. Tan diad pakapanparaan tayo, mas makabaliksan tan makana so silibrasyon tayo na Fiesta na Inkianak na Katawan. Tan twan "Merry Christmas" so walad sikatayo. Ontan pa komon. Amen.